Sarë Gjergji boton monografi letrare për poetin Isak Ahmeti
Libri del në 80-vjetorin e lindjes dhe 60-vjetorin e veprimtarisë së shkrimtarit Ahmeti, nga SHB Lena në Prishtinë.
PRISHTINË — Shkrimtari dhe studiuesi Sarë Gjergji ka botuar monografinë letrare "Isak Ahmeti poet dhe studiues i letërsisë", nga Shtëpia Botuese "Lena" në Prishtinë. Libri del në jubileun e 80-vjetorit të lindjes dhe 60-vjetorit të veprimtarisë krijuese të shkrimtarit Isak Ahmeti.
Sarë Gjergji lindi më 15 dhjetor 1965 në Stubëll të Epërme të Vitisë. Pas përfundimit të studimeve universitare, ai vazhdoi angazhimin si doktorant në Universitetin "Shën Çirili e Metodi" në Shkup, ku studioi ndikimin e tekstit biblik në letërsinë shqipe. Ai është anëtar i Lidhjes së Shkrimtarëve të Kosovës.
Ndër veprat më të njohura të Gjergjit janë "Golgotë" (1994), "Kontrast ngjyrash" (1996), "Terapia e vdekjes – Requiem për Kosovën?" (2000), "Peizazh toke" (2004), vëllimi poetik në gjuhën rumune "Foc nestins" (2007) dhe "Ave Aelia" (2018).
Librin e hap një recension i studiueses Prof. dr. Luljeta Isaku, e cila shkruan se qasja e autorit "është e kujdesshme dhe e përmbajtur". Sipas saj, "kjo e bën librin të besueshëm, sepse vlerësimi mbështetet në analizë dhe në argumentim të brendshëm".
Vepra e Gjergjit ndahet në dy pjesë: Isak Ahmeti si poet dhe Isak Ahmeti si studiues i letërsisë. Pjesa e parë analizon katër vëllime poetike të Ahmetit — "Gallatea", "Uratë zbulimi", "Kushtimebëse" dhe "Dritë e përjetësuar" — duke u ndalur te simbolika, miti, historia dhe përvoja ekzistenciale e njeriut.
Sipas Gjergjit, poezia e Ahmetit trajton si motive universale dashurinë, atdheun, besimin dhe kujtesën historike. Në poezinë "Me ty ose pa ty" (f. 12), hapësira e Kosovës shfaqet përmes imazhit të rrugëve të asfaltuara të mbuluara nga pluhuri dhe gazetës "Rilindja" të varur si flamur ngadhënjimi pas betejës.
Katër vëllimet poetike, sipas librit, dëshmojnë një zhvillim të qartë krijues — nga kondensimi simbolik i hershëm në "Gallatea" deri te dimensioni metafizik i dritës, simbol i së vërtetës dhe shpresës, në "Dritë e përjetësuar". Krijimtaria dhe puna studimore e Gjergjit, thuhet në artikull, përbëjnë një kontribut të çmuar në pasurimin e letërsisë dhe mendimit kulturor shqiptar.
Burim: Fjala
— Redaksia ZHURMA
