SafeJournalists kërkon hetim nga AMP për gazetarin holandez
Rrjeti ndërkombëtar kërkon sqarime për përmbajtjen e telefonit të gazetarit Vincent van Gerven Oei pas ndalimit në Tiranë.
Redaksia ZHURMA · · 1 min lexim
TIRANË — Rrjeti ndërkombëtar SafeJournalists ka reaguar lidhur me ndalimin e autorit dhe gazetarit holandez Vincent W.J. van Gerven Oei gjatë protestës studentore, duke dënuar veprimet e raportuara të forcave policore që përfshijnë prangosjen, përdorimin e sprejit djegës dhe sekuestrimin e pajisjes celulare. Siç raportoi Zhurma më 8 nëntor 2026, efektivët e policisë kishin shoqëruar më parë gazetarin dhe kishin goditur me spraj me piper aktivisten Alisa Braho, e cila po filmonte ngjarjen pranë Parkut Rinia.
Organizata ndërkombëtare kërkon nga Agjencia e Mbikëqyrjes Policore që të hetojë veprimet ndaj gazetarit dhe të sqarojë nëse përmbajtja e telefonit të tij është aksesuar apo kopjuar gjatë kohës që ndodhej i sekuestruar. Sipas të dhënave nga reagimi, pajisja iu kthye atij mbrëmjen e së dielës pas ndërhyrjes së prokurorisë, ndërsa institucionet u bëjnë thirrje autoriteteve të respektojnë garancitë ligjore dhe Udhëzuesin për Sigurinë e Gazetarëve.
