EFJ: 55 sulme ndaj gazetarëve gjatë protestave në Shqipëri

Federata Evropiane e Gazetarëve (EFJ) ka reaguar ndaj situatës së sigurisë për gazetarët në Shqipëri, duke theksuar numrin e lartë të incidenteve gjatë protestave në vend. Sipas të dhënave të rrjetit SafeJournalists dhe Asociacionit të Gazetarëve të Shqipërisë (AGSH), nga 13 deri më 31 tetor janë dokumentuar të paktën 55 sulme ndaj gazetarëve dhe punonjësve të medias.

Në njoftimin publik, EFJ vë në dukje se shumica e rasteve të dhunës u atribuohen punonjësve të Policisë së Shtetit. Rastet e regjistruara përfshijnë dhunë fizike, fyerje verbale, ndalime, pengim të ushtrimit të detyrës dhe sekuestrim të pajisjeve të punës. Organizata shton se autoritetet ishin njoftuar përmes një letre të hapur më 14 tetor nga më shumë se 30 organizata, por sipas tyre sulmet kanë vijuar me frekuencë të lartë.

Duke kujtuar rrugën e Shqipërisë drejt anëtarësimit në Bashkimin Evropian, federata u bën thirrje autoriteteve të marrin masa mbrojtëse dhe të vënë para përgjegjësisë personat e përfshirë, duke garantuar lirinë e medias dhe informimin transparent.