SPAK kërkon 25 vite burg për Emiljano Shullazin dhe Lulzim Berishën
Prokuroria e Posaçme paraqet pretencën për vrasjet e vitit 2005, duke kërkuar dënime të rënda për të pandehurit dhe 8 vite për bashkëpunëtorin e drejtësisë.
Redaksia ZHURMA · · Përditësuar · 2 min lexim
TIRANË — Prokuroria e Posaçme ka paraqitur pretencën për dosjen e vrasjeve të Vajdin Lamajt dhe Klodian Saliut, ngjarje të ndodhura në muajin shkurt të vitit 2005, të cilat fillimisht ishin pezulluar për shkak të mosidentifikimit të autorëve, para se çështjet të bashkoheshin në një procedim të vetëm. Sipas SPAK, kërkohen nga 25 vite burg për Emiljano Shullazin, Viktor Bajraktarin (Imeraj), Indrit Taullain, Lulzim Berishën, Plaurent Dervishajn dhe Indrit Rusin, ndërsa për bashkëpunëtorin e drejtësisë, Luftar Reçi, kërkohet dënimi me 8 vite burg.
Ngjarja e parë daton më 26 shkurt 2005, rreth orës 22:00, në segmentin rrugor Durrës-Maminas, në afërsi të fshatit Koxhaj, ku u qëllua për vdekje Klodian Saliu teksa udhëtonte me automjetin e tij tip Mercedes-Benz, ndërsa mbeti i plagosur edhe O. Truma. Një ditë më vonë, më 27 shkurt 2005, rreth orës 23:50, një shpërthim me lëndë plasëse në pallatin ku banonte Vajdin Lame, në rrugën “Dervish Hima” në Tiranë, shkaktoi vdekjen e tij dhe të A. Arsisë. Hetimet e deritanishme tregojnë se mbi të pandehurit rëndojnë akuza për vrasje me paramendim në bashkëpunim në formën e grupit të strukturuar kriminal, mbajtje pa leje të armëve luftarake dhe vrasje në rrethana të tjera cilësuese kundër disa personave.
