Begaj dhe Mattarella presin krerët arbëreshë në Quirinale

Presidenti i Shqipërisë, Bajram Begaj, dhe Presidenti i Italisë, Sergio Mattarella, pritën së bashku në Pallatin Quirinale kryetarët e të gjitha komunave arbëreshe në Itali. Gjatë këtij takimi, kreu i shtetit shqiptar u shpreh se «miqësitë mes shteteve mund të ndërtohen nga interesat e përbashkëta, ndërsa vëllazëria lind nga historia, nga kujtesa, lind nga lidhjet njerëzore» dhe se komuniteti arbëresh përbën themelin e kësaj vëllazërie. Begaj vlerësoi se arbëreshët ruajnë gjuhën, traditat dhe identitetin prej më shumë se pesë shekujsh, ndërsa falënderoi homologun italian për organizimin e ngjarjes dhe e cilësoi atë si mik të çmuar të Shqipërisë dhe mbështetës të integrimit evropian të vendit.

Gjatë fjalës së tij, Begaj theksoi rëndësinë e modelit të integrimit të arbëreshëve dhe të komunitetit të ri të shqiptarëve që jetojnë, studiojnë e punojnë prej dekadash në Itali. Sipas tij, ruajtja e identitetit kombëtar dhe integrimi në shoqërinë pritëse nuk e përjashtojnë njëri-tjetrin, por e pasurojnë atë dhe forcojnë mirëkuptimin ndërmjet popujve në një Evropë që përballet me sfida të shumta. Përveç lidhjeve historike dhe njerëzore, u vlerësua aleanca strategjike dypalëshe, bashkëpunimi në kuadër të NATO-s dhe synimi i përbashkët për integrim në Bashkimin Evropian, ku Italia mbetet një nga mbështetëset kryesore. Në fund të takimit, krerët e të dy shteteve këmbyen dekorata në shenjë vlerësimi të ndërsjellë, ndërsa Presidenti Begaj u bëri thirrje kryetarëve të komunave arbëreshe që t'i ftojnë të rinjtë të dashurohen me traditën.