Sa kushtoi modernizimi i Drejtorisë së Policisë në Elbasan?

ELBASAN — Ministri i Punëve të Brendshme, Besfort Lamallari, dhe drejtori i Përgjithshëm i Policisë së Shtetit, Skënder Hita, inauguruan sot ambientet e reja të Drejtorisë Vendore të Policisë në Elbasan, një investim prej 392.6 milionë lekësh. Projekti synon modernizimin e infrastrukturës policore dhe përmirësimin e shërbimit ndaj qytetarëve.

Godina e re përfshin tre kate mbi tokë dhe një kat nëntokë, me sallë operative, hapësira për shërbimin ndaj qytetarëve, ambiente për punonjësit dhe njësinë e qenve të policisë. Rikonstruktuar janë edhe Komisariati i Policisë, ofiçina e riparimit të mjeteve dhe kabina elektrike.

Ministri Lamallari theksoi se investimi është një hap i rëndësishëm për forcimin e shtetit të së drejtës. "Infrastruktura moderne është domosdoshmëri për një polici më efikase dhe më pranë qytetarëve," deklaroi ai, duke shtuar se modernizimi i godinave shoqërohet me përmirësimin e teknologjisë dhe profesionalizmit të punonjësve.

Ambientet e reja ofrojnë kushte më të mira pune për 332 punonjës të Policisë në Elbasan. Dhomat e shoqërimit dhe ndalimit janë ndërtuar sipas standardeve bashkëkohore, me hapësira të veçanta për të miturit, takimet me avokatin dhe ekzaminimin mjekësor, duke garantuar trajtim dinjitoz.

Salla operative e re lejon marrjen dhe transmetimin e informacionit në kohë reale, duke rritur kapacitetet e reagimit dhe koordinimit. Drejtori Hita vlerësoi se ky investim do të shërbejë të gjithë banorëve të Elbasanit, jo vetëm efektivëve. "Jemi të vendosur të vazhdojmë veprimtarinë tonë për ruajtjen e rendit dhe sigurisë publike," tha ai.

Burim: ATSH
— Redaksia ZHURMA