Rugova: Abdixhiku nuk e ka të lehtë ta udhëheqë LDK-në pas Ibrahim Rugovës

Deputeti i Lidhjes Demokratike të Kosovës, Ukë Rugova, deklaroi se kryetari aktual Lumir Abdixhiku nuk e ka të lehtë ta udhëheqë këtë parti pas udhëheqjes së ish-presidentit Ibrahim Rugova. Ai shtoi se debati dhe përplasjet verbale për postin e kryetarit mes Abdixhikut dhe kryetarit të Prishtinës, Përparim Rama, përbëjnë pjesë të demokracisë së brendshme partiake.

Debati për udhëheqjen e ardhshme të partisë ka nisur megjithëse zgjedhjet e brendshme të LDK-së janë ende larg. Gjatë muajit tetor, kryetari i Prishtinës, Përparim Rama, deklaroi se është i gatshëm ta marrë drejtimin e LDK-së dhe se ka pasur biseda për këtë çështje si me Abdixhikun, ashtu edhe me anëtarë të tjerë. Rama theksoi se i ka ndihmuar partisë duke e kthyer atë të parën në kryeqytet pas 12 viteve. ndërsa kryetari i LDK-së, Lumir Abdixhiku, reagoi shkurt ndaj këtyre deklaratave duke i cilësuar ato si diskutime të nivelit të ulët për politikën e Kosovës. Paraprakisht, më 30 korrik, Abdixhiku u rizgjodh kryetar i LDK-së me 170 vota.

Në një intervistë për Ekonomia Online, deputeti Ukë Rugova sqaroi se LDK-ja është partia e parë demokratike e themeluar në këto treva dhe në rajonin e Ballkanit, duke nënvizuar se demokracia është gjithmonë e pranishme në strukturat e saj. Rugova vuri në dukje se në LDK zakonisht ka kandidat dhe kundërkandidat, ndaj nuk përbën diçka të re nëse paraqiten kandidatura të tjera për zgjedhjet e ardhshme. Ai shprehu mirëkuptim për vështirësitë dhe presionin me të cilin përballet Abdixhiku në drejtimin e partisë. Po ashtu, Rugova nënvizoi nevojën e bashkëpunimit brenda subjektit politik për t'i shtyrë proceset përpara në interes të vendit, ndërsa refuzoi të përcaktojë se cilin kandidat do të mbështesë në garën e ardhshme.

Lidhja Demokratike e Kosovës do të zhvillojë zgjedhjet e saj të rregullta brendapartiake në nëntor të vitit të ardhshëm. Gjatë atij procesi pritet të analizohen kandidaturat zyrtare dhe të vendoset nëse Abdixhiku do të vazhdojë mandatin apo nëse do të zgjidhet një tjetër udhëheqës i partisë.

I pyetur për garën dhe përplasjen mes Ramës dhe Abdixhikut, Ukë Rugova tha: «LDK-ja ka zgjedhje të rregullta vitin e ardhshëm, në nëntor të vitit të ardhshëm, dhe deri atëherë të shohim cilët kandidatë do të jenë dhe a do të vazhdojë zoti Abdixhiku, apo do të ketë kandidatura të tjera. LDK-ja është partia e parë demokratike që është themeluar në këto treva, në trojet etnike shqiptare, por po ashtu edhe në rajonin e Ballkanit, sado që demokracia është prezente gjithmonë në LDK». Lidhur me mbështetjen e tij, ai shtoi: «Po, kjo është pjesë e demokracisë së brendshme në LDK, t’i presim kur vjen koha e zgjedhjeve, atëherë e shohim se kë e përkrahim». Për vështirësitë e kryetarit aktual, ai u shpreh: «Po, kam përsëritur shpesh që për zotin Abdixhiku nuk është e lehtë të trashëgojë një pozitë atje, ku është si kryetar i LDK-së pas partisë, partisë prej prezencës së Ibrahim Rugovës, vetë duke qenë e di se çfarë presioni është, sado që e kuptoj që edhe zoti Abdixhiku, kryetari Abdixhiku, nuk e ka të lehtë». Për bashkëpunimin brenda partisë, ai përfundoi: «Po gjithmonë edhe i kam thënë që bashkë ne duhet të punojmë që t’i shtyjmë proceset përpara për të mirë të Kosovës».