RTSH hap aplikimet për Festivalin e Këngës — kufizohet inteligjenca artificiale
Krijimet origjinale pranohen online nga 22 deri më 27 shtator, ndërsa organizatorët kanë vendosur kufizime për përdorimin e inteligjencës artificiale.
TIRANË — Radio Televizioni Shqiptar ka hapur zyrtarisht aplikimet për edicionin e 65-të të Festivalit të Këngës, i cili do të zhvillohet në dhjetor. Ky institucion u ka bërë thirrje kompozitorëve, autorëve dhe interpretuesve shqiptarë nga Shqipëria, Kosova dhe diaspora që të paraqesin krijimet e tyre për të qenë pjesë e këtij edicioni.
Sipas rregullores së festivalit, këngët konkurruese duhet të jenë vepra origjinale dhe të papublikuara më parë në asnjë platformë. Organizatorët kanë vendosur gjithashtu kufizime të qarta për përdorimin e Inteligjencës Artificiale në krijimin dhe prodhimin e këngëve pjesëmarrëse, me qëllim ruajtjen e autorësisë dhe krijimtarisë artistike njerëzore.
Aplikimet do të jenë të hapura për një periudhë pesëditore, nga data 22 deri më 27 shtator. Artistët e interesuar mund të dorëzojnë materialet e tyre online përmes formularit të publikuar në platformën zyrtare të Festivalit të Këngës.
Burim: KultPlus
— Redaksia ZHURMA
