Rrugët Shtetërore ia faturojnë 'Makedonijapat' tabelën pa shqip në Tabanoc

SHKUP — Ndërmarrja Publike për Rrugët Shtetërore ka deklaruar se nuk ka dhënë asnjë urdhër për vendosjen e tabelës së re informuese në pikën kufitare në Tabanoc, e cila përjashton tërësisht gjuhën shqipe. Ky institucion ka sqaruar se kompetencat për mirëmbajtjen e rrugëve dhe sinjalistikën vertikale e horizontale i takojnë ndërmarrjes publike 'Makedonijapat'.

Tabela e vendosur së fundmi në kufi përmban mbishkrime vetëm në gjuhët maqedonase, angleze dhe frënge. Ky veprim ka nxitur reagime të shumta në opinionin publik dhe në rrjetet sociale, ku qytetarë dhe përfaqësues të opozitës shqiptare, përfshirë Bujar Osmanin, kanë kritikuar ashpër institucionet përgjegjëse për shmangien e gjuhës shqipe.

Nga ana tjetër, zëvendësdrejtori i Doganave, Mustafa Dauti, publikoi një video për të treguar një tabelë që përmbante edhe gjuhën shqipe në atë lokacion. Megjithatë, u sqarua se ajo tabelë është vendosur vite më parë gjatë ndryshimit të emrit të shtetit, ndërsa tabela e re e vendosur së fundmi është krejtësisht ndryshe.

Ky rast pason reagimet ku theksohet se gjuha shqipe po hiqet nga tabelat kufitare në Tabanoc. Ndërmarrja 'Makedonijapat' nuk ka kthyer përgjigje ndaj pyetjeve të adresuara nga mediat për të sqaruar arsyet e këtij vendimi, ndërkohë që raste të tilla të përjashtimit të shqipes nga sinjalistika rrugore po përsëriten shpesh në vend.

Burim: Portalb
— Redaksia ZHURMA