Rritet shqetësimi për vjedhjet në Zvicër, banorët organizohen në WhatsApp

Frika nga vjedhjet nëpër banesa po shtohet në rajonin Terre Sainte të kantonit Vaud në Zvicër, ku qindra banorë janë organizuar në grupe WhatsApp për të shkëmbyer informacione dhe për të mbajtur nën vëzhgim lagjet e tyre, ndërsa dëmi në një rast të fundit në komunën Tannay është vlerësuar në rreth 20 mijë franga zvicerane.

Me shkurtimin e ditëve gjatë vjeshtës dhe kalimin në orën dimërore, rreziku nga vjedhjet nëpër banesa zakonisht shtohet, duke prekur veçanërisht pjesën perëndimore të kantonit Vaud mes qyteteve Nyon dhe Gjenevë, ndërsa frika e banorëve është shtuar edhe për shkak të një rasti të rëndë të grabitjes në banesën e disa personave të moshuar, të njohur si homejacking.

Sipas banores së prekur, e identifikuar si Marie-Eliane, autorët shfrytëzuan mungesën e saj dhe një derë të pasme të lënë hapur për të marrë sende personale dhe stoli, ndërsa ajo ka deklaruar për televizionin zviceran RTS: «Është ende një përvojë shumë shqetësuese. Duhet patjetër të mbrohemi. Kam pasur fat që fqinjët po kujdeseshin për mua, veçanërisht falë kamerave të sigurisë, përmes të cilave arritën të njoftonin për rastin. Bashkëpunimi mes fqinjëve është shumë i rëndësishëm».

Në rajonin Terre Sainte, ku bëjnë pjesë komunat Bogis-Bossey, Chavannes-de-Bogis, Chavannes-des-Bois, Commugny, Coppet, Founex, Mies dhe Tannay, banorët po përdorin rrjetet sociale dhe platformat ku në disa grupe WhatsApp janë përfshirë deri në 700 anëtarë për të raportuar raste të dyshimta, siç bën të ditur kryetari i komunës Tannay, Michaël Schlegel, i cili thotë se grupet e tilla janë krijuar gjatë muajve të fundit dhe numri i tyre po vazhdon të rritet, pasi banorët kanë nevojë të informohen më shumë dhe të ndihen më të sigurt.

Autoritetet lokale po ndërmarrin masa për të rritur sigurinë, ku në komunën Tannay janë vendosur kamera të reja, është përforcuar ndriçimi publik, është përmirësuar mbikëqyrja e hyrjeve në fshat dhe komuna ka angazhuar një kompani private për shtimin e patrullave, ndërsa brenda këshillit komunal është krijuar një grup pune për çështjet e sigurisë, kurse policia ka zgjeruar oraret e patrullimit dhe po zhvillon aktivitete parandaluese.

Pascal Stockbürger, shef i stacionit policor në Coppet, ka bërë të ditur se qytetarët mund të kërkojnë kontrolle parandaluese të sigurisë në shtëpitë e tyre, ku zyrtarët vlerësojnë gjendjen e dyerve dhe pikave të mundshme të hyrjes, ndërsa policia u bën thirrje qytetarëve të raportojnë automjetet e panjohura pranë banesave apo lëvizjet e dyshimta.

Pavarësisht shqetësimit të banorëve, policia thotë se gjatë vitit 2026 numri i vjedhjeve nuk është rritur krahasuar me vitet e kaluara, madje sipas Pascal Stockbürger ai është i barabartë ose më i ulët, megjithëse që nga fillimi i tetorit janë regjistruar më shumë telefonata për persona të dyshimtë dhe më shumë raste vjedhjesh sesa në muajt e verës si dukuri sezonale e vjedhjeve në muzg.