E reja sfidon veten të udhëtojë në Indinë me 10 mijë rupi

Një krijuese e re e përmbajtjes ka nisur një sfidë të pazakontë për të udhëtuar në të gjithë Indinë me një buxhet prej vetëm 10 mijë rupish, ndërsa rrugëtimi i saj dokumentohet në rrjetet sociale. Përvojat e këtij udhëtimi janë shpërndarë gjerësisht, duke tërhequr vëmendjen e mijëra përdoruesve online.

Në një video të publikuar në Instagram dhe YouTube, autoria e sfidës shpjegoi se deri më tani ka vizituar gjashtë shtete indiane. Sipas të dhënave të bëra publike prej saj në rrjetet sociale, shpenzimet e kryera deri në këtë fazë të rrugëtimit llogariten në vetëm dy mijë rupi.

Rrugëtimi ka ngjallur reagime dhe diskutime të shumta ndërmjet përdoruesve të internetit, të cilët kanë shprehur mendime të ndryshme lidhur me realizueshmërinë e një nisme të tillë. Disa ndjekës kanë vënë në pikëpyetje mënyrën se a mund të mbulohen shpenzimet për fjetjen, ushqimin dhe transportin me një shumë kaq të kufizuar parash, ndërsa të tjerë kanë argumentuar se planifikimi i kujdesshëm mund ta bëjë të mundur një gjë të tillë.

Në diskutimet e zhvilluara online rreth kësaj çështjeje, një përdorues i rrjeteve sociale u shpreh se suksesin e një nisme të tillë e përcaktojnë zgjedhjet e duhura ekonomike, duke theksuar se gjithçka varet nga mënyra e transportit, vendi i qëndrimit dhe ushqimi që zgjidhet. Një tjetër komentues pohoi se udhëtimi me një buxhet kaq modest mund të realizohet nëse organizohet me kujdes.

Në materialet e publikuara nga rrugëtimi i saj, krijuesja e përmbajtjes pranoi se nuk ndihet plotësisht e sigurt nëse buxheti fillestar do t'i mjaftojë për të përmbyllur të gjithë planin e udhëtimit. Ajo shtoi se kjo sfidë e pazakontë do të konsiderohet e mbyllur sapo t'i ketë shpenzuar të gjitha paratë e vëna në dispozicion për këtë nismë.

Për më tepër, ajo bëri të ditur se një pjesë e konsiderueshme e vendit i ka mbetur ende pa vizituar dhe shprehu skepticizëm se a do të arrijë ta përshkojë të gjithë Indinë me shumën prej 10 mijë rupish. Sipas saj, megjithëse disa njerëz mund të shpenzojnë dhjetë mijë rupi vetëm për të vizituar një vend të vetëm, qëllimi i saj mbetet eksplorimi i të gjithë territorit.