Rriten rastet me të vjella në Vlorë, dyshime për ujin e pijshëm

VLORË — Spitali Rajonal i Vlorës ka regjistruar një shtim të qytetarëve që paraqiten në urgjencë me simptoma të përzierjeve, të vjellave dhe diarresë. Këto raste vijnë kryesisht nga lagjet “28 Nëntori” dhe “29 Nëntori”, ku banorët e prekur kanë marrë serum dhe ndihmën e nevojshme mjekësore përpara se të kthehen në banesat e tyre pa pasur nevojë për shtrim të mëtejshëm.

Dyshimet paraprake lidhen me cilësinë e furnizimit me ujë të pijshëm në këtë zonë, ku problematika dyshohet se ka nisur pas një ndërhyrjeje riparimi në rrjetin e ujësjellësit. Ndërkohë, analizat e kryera në mostrat e marra të ujit kanë evidentuar mungesë të klorit në dy prej tyre, ndërsa në mostrat e tjera parametrat kanë rezultuar brenda normave të lejuara. Deri më tani, autoritetet nuk kanë dhënë ende një konfirmim zyrtar për lidhjen mes problemeve shëndetësore të banorëve dhe konsumit të ujit.