Rizvanolli: Krizat globale i kanë bërë çmimet 500 euro si diçka e zakonshme

Ministrja e Ekonomisë, Artane Rizvanolli, gjatë fjalës së saj në Kuvendin e Kosovës, ka folur rreth investimeve që po ndërmerren në Korporatën Energjetike të Kosovës për përmirësimin e infrastrukturës prodhuese. Sipas saj, kur diskutohet për uljen e prodhimit të rrymës nga KEK-u, duhet pasur parasysh i gjithë konteksti.

Duke u ndalur te çmimet në tregjet ndërkombëtare, ministrja Rizvanolli theksoi se krizat që po përsëriten kanë ndikuar që shifra prej 500 euro për megavat orë të duket si diçka e zakonshme. «Krizat po përsëriten. I kanë bërë çmimet 500 euro për megavat orë si diçka e zakonshme», u shpreh ajo.

Gjithashtu, ajo përmendi konfliktin në Iran dhe mbylljen e Ngushticës së Hormuzit si zhvillime që kanë shkruar probleme të mëdha globale dhe evropiane. «Jam e vetdijshme që sektori i energjisë ka sfida në muajt në vijim, Kur çmimet në tregjet ndërkombëtare janë të larta, e kur konflikti në Iran e mbyllja e ngushticës së Hormuzit kanë krijuar probleme të mëdha jo vetëm për Evropën por edhe globalisht», deklaroi ajo, ndërsa deputetja e LDK-së, Hykmete Bajrami, ka përmendur deklarimet e mëparshme të kreut të LVV-së për uljen e çmimit të energjisë.