Rivarroset Heroi i Kosovës Idriz Rrecaj pas 27 vjetësh

Eshtrat e Heroit të Kosovës, Idriz Rrecaj, i cili ishte rrëmbyer dhe zhdukur me dhunë më 19 prill 1999, janë gjetur në një varrezë masive në veri të vendit dhe janë identifikuar përmes analizës së ADN-së. Ceremonia e rivarrimit është mbajtur në Kompleksin Memorial në Marinë të Skenderajt, ku qindra qytetarë morën pjesë për t'i dhënë lamtumirën e fundit.

Në këtë ngjarje përkujtimore morën pjesë personalitete të ndryshme, përfshirë ish-presidenten Vjosa Osmani, kryetarin e Skenderajt, Sami Lushtaku, si dhe deputetë të Kuvendit të Kosovës. Kryesuesi i Komisionit Qeveritar për të Zhdukurit, Kushtrim Gara, ka evokuar dhimbjen e familjes gjatë viteve të gjata të pritjes, duke kujtuar takimin me familjarët në qendër të Skenderajt pranë bustit të heroit, ku u nda lajmi për identifikimin e eshtrave.

Idriz Rrecaj lindi më 10 nëntor 1944 në Llaushë dhe gjatë jetës së tij shërbeu si mësues, inxhinier i bujqësisë dhe veprimtar i çështjes kombëtare. Ai kontribuoi në organizimin e rezistencës, arsimin shqip, pajtimin dhe solidaritetin, si dhe e mbështeti fuqishëm luftën çlirimtare. Për këtë përkushtim ndaj lirisë së vendit, ai u dekorua në vitin 2019 me urdhrin «Hero i Kosovës».