Rikthehet në operim blloku A3 i termocentralit Kosova A

Korporata Energjetike e Kosovës ka bërë të ditur se është rikthyer në operim njësia A3 e termocentralit Kosova A, pasi janë kryer ndërhyrjet teknike dhe sanimet e problemeve të evidentuara. Sipas njoftimit zyrtar, njësia u sinkronizua me rrjetin elektroenergjetik në orët e para të mëngjesit dhe aktualisht funksionon rregullisht me një gjendje stabile.

KEK-u ka vlerësuar se ky rikthim vjen si pasojë e angazhimit intensiv, profesionalizmit dhe përkushtimit të ekipeve teknike që vepruan për eliminimin e mangësive. «Korporata Energjetike e Kosovës (KEK Sh.A.) njofton se, pas përfundimit me sukses të ndërhyrjeve teknike dhe sanimit të problemeve të evidentuara, njësia A3 e TC Kosova A është sinkronizuar me rrjetin elektroenergjetik në orët e para të mëngjesit dhe aktualisht është në operim të rregullt, me gjendje stabile», shtohet në komunikatë.