Rexhepi: Shqiptarët nga Kosova po vijnë masivisht për të votuar në Luginë

Kryetari i Këshillit Kombëtar Shqiptar, Enkel Rexhepi, ka folur mbi rëndësinë e zgjedhjeve dhe mobilizimin e shqiptarëve të Luginës së Preshevës që jetojnë në Kosovë. Gjatë një paraqitjeje televizive, ai theksoi se qytetarët me të drejtë vote janë nisur masivisht për të marrë pjesë në procesin zgjedhor.

Duke përmendur situatën në terren, Rexhepi u shpreh se «shqiptarët nga Kosova janë nisur gati të gjithë dhe janë duke ardhur që nesër të dalin masovikisht» pavarësisht kolonave të gjata dhe pritjeve në kufi. Sipas tij, ky mobilizim shërben për të vendosur për Luginën dhe për të siguruar sa më shumë zëra në parlamentin serb.

Rexhepi ka falënderuar institucionet e Republikës së Kosovës për mbështetjen, duke përmendur gjithashtu thirrjet nga liderët politikë në Maqedoninë e Veriut dhe telefonatat e marra nga Mali i Zi. Ai theksoi se shqiptarët e Luginës mbeten populli më i diskriminuar në rajon dhe Evropë, ndaj unifikimi politik i arritur është vendimtar përballë politikave të Beogradit.