Reuten: Turp dhe skandal ngecja e aplikimit të Kosovës në BE

Eurodeputeti holandez Thijs Reuten e ka cilësuar si «turp dhe skandal» faktin se aplikimi i Kosovës për anëtarësim në Bashkimin Evropian ka mbetur pa u proceduar. Gjatë komentimit të Raportit të Progresit, ai theksoi se viti i kaluar ishte i vështirë për vendin për shkak të shpenzimit të kohës në procese politike, zgjedhje dhe formimin e qeverisë së re, gjë që solli përparim të kufizuar.

Reuten deklaroi se nuk ekzistojnë pengesa në traktatet e Bashkimit Evropian që do të ndalonin nisjen e procedurës për dërgimin e pyetësorit për Kosovën, pavarësisht se disa shtete anëtare ende nuk e njohin pavarësinë. Ai kërkoi që vendi të mos heqë dorë nga reformat, veçanërisht në fushën e drejtësisë dhe sundimit të ligjit.

Duke shtuar se do të vazhdojë të avokojë për këtë çështje, eurodeputeti holandez shprehu pritjen që Qeveria e re të përqendrohet plotësisht në zbatimin e reformave të nevojshme.