Pekini konfirmon diskutimet për një samit historik Xi-Trump-Putin

Pekini ka konfirmuar se po zhvillon diskutime për një takim mes liderit kinez Xi Jinping, presidentit amerikan Donald Trump dhe presidentit rus Vladimir Putin. Zëdhënësja e Ministrisë së Jashtme të Kinës, Mao Ning, deklaroi se vendi është në komunikim me palët përkatëse për këtë çështje, ndërsa takimi mund të mbahet në qytetin Shenzhen gjatë një samiti rajonal. Edhe pse ende nuk ka një vendim përfundimtar, ekspertët vlerësojnë se një organizim i tillë do të shërbente kryesisht për një fotografi të përbashkët për shkak të interesave të ndryshme të liderëve.

Sipas drejtoreshës së programit për Kinën në Qendrën Stimson, Sun Yun, «besoj se takimi do të mbahet; çështja është formati dhe përmbajtja e tij». Ajo shtoi se Kina dëshiron imazhin, por jo kostot, ndërsa Rusia synon ta përdorë samitin për të afruar qëndrimet rreth luftës në Ukrainë. Nga ana tjetër, ish-zyrtari i lartë amerikan Danny Russel theksoi se Putin ka më së shumti për të përfituar nga ky format trepalësh, ndërsa Trump njihet për pëlqimin e tij ndaj liderëve të fortë.

Në rrafshin ekonomik, Donald Trump pritet të udhëtojë drejt Shenzhenit për ta ruajtur armëpushimin tregtar që skanon në janar. Ndërkohë, përfaqësuesi amerikan për Tregtinë, Jamieson Greer, i kërkoi zëvendëskryeministrit kinez He Lifeng që Pekini të ndërmarrë veprime konkrete për zbatimin e zotimeve lidhur me produktet bujqësore dhe mineralet kritike. Agjencia kineze Xinhua njoftoi se palët patën një shkëmbim konstruktiv, ku Kina shprehu shqetësim për masat kufizuese të Uashingtonit.