Zulfaj zhvillon takime në Bruksel për rrugën evropiane të Kosovës

Kryenegociatori i Kosovës me Bashkimin Evropian, Jeton Zulfaj, ka realizuar disa takime me eurodeputetë në ambientet e Parlamentit Evropian në Bruksel. Gjatë vizitës së tij, ai është takuar me eurodeputetin kroat Tonino Picula, me eurodeputetin nga Suedia Adnan Dibrani, si dhe me eurodeputetin Reuten.

Gjatë bisedave është diskutuar për hapat e Kosovës drejt Bashkimit Evropian, rëndësinë e mbështetjes nga Parlamenti Evropian, si dhe për procesin e marrjes së statusit të vendit kandidat. Zulfaj ka shprehur mirënjohje për angazhimin dhe mbështetjen e deritanishme për rrugëtimin integrues të vendit, duke veçuar kontributin e eurodeputetëve në mbështetje të çështjeve kosovare. Po ashtu, gjatë diskutimeve është vënë theksi te parimi i meritës, sundimi i ligjit dhe harmonizimi me politikën e jashtme dhe të sigurisë të bllokut.