Rama: Mafia shqiptare nuk ekziston, raportimet janë gjepura
Kryeministri Edi Rama komenton protestat në Tiranë dhe hedh poshtë raportimet për krimin e organizuar në një intervistë për gazetarin amerikan.
Redaksia ZHURMA · · Përditësuar · 1 min lexim
TIRANË — Kryeministri Edi Rama ka komentuar protestat e zhvilluara në Tiranë dhe akuzat për rritjen e krimit të organizuar gjatë një interviste për gazetarin amerikan Andrew Callaghan në emisionin “Channel 5”, intervistë e zhvilluar gati një muaj më parë. I pyetur për tubimet dhe kërkesat e qytetarëve për ndryshim, kreu i qeverisë tha se gjatë javës së parë të protestave janë mbajtur shënime për shqetësimet e ngritura dhe se disa prej tyre kanë nisur të zbatohen, duke përmendur lançimin e një pasqyre digjitale për transparencë.
Ndërkohë, lidhur me raportimet ndërkombëtare dhe të dhënat mbi fuqizimin e grupeve kriminale shqiptare në tregjet e kokainës, Rama i cilësoi pretendimet për ekzistencën e një mafieje shqiptare si gjepura. Sipas tij, në këtë zinxhir përfshihen kombësi të ndryshme, ndërsa shtoi se drejtuesi i SPAK i ka pohuar më parë se nuk ekziston diçka e tillë si mafia shqiptare.
