Banorët e Ulpianës ndahen për projektin e Lojërave Mesdhetare 2030

Projekti “Ulpiana 2030 Legacy”, që parasheh ndërtimin e një objekti për akomodimin e sportistëve gjatë Lojërave Mesdhetare 2030, ka nxitur reagime dhe qëndrime të ndryshme te banorët e lagjes për ndërhyrjet e planifikuara në hapësirën e gjelbër. Këshilli i Banorëve të Lagjes “Ulpiana” i ka kërkuar kryetarit të Prishtinës, Përparim Rama, anulimin e vendimit për caktimin e lokacionit, duke theksuar në një letër se hapësirat e përcaktuara nuk janë të lira. Ndërkohë, drejtori i Planifikimit Strategjik, Bekim Ramku, ka deklaruar se kapacitetet e konvikteve nuk janë të mjaftueshme, kurse kryetari Rama ka siguruar se Fontana nuk do të preket nga ky projekt, ndërsa Gëzim Sveçla ka shprehur kundërshtimin e tij.

Banorët e lagjes shfaqin opinione të ndara lidhur me ndërhyrjet e paralajmëruara. Banori Kadaf Murseli thotë se e mirëpret mundësinë e ndërtimit të parkingut nëse nuk dëmtohet parku, duke përmendur se në lagje ka shumë vetura të parkuara jo në mënyrë të rregullt. Në krahun tjetër, banori Enver Makolli kundërshton realizimin e projektit në këtë lokacion duke vlerësuar se hapësira i vyn komunitetit dhe ka ngritur shqetësimin për mungesën e konsultimit publik me banorët.