Sa vende pune krijon partneriteti i Ramës me 'Fincantieri'?
Marrëveshja mes kompanisë italiane dhe kompanisë shtetërore 'Kayo' synon rilindjen e industrisë ushtarake përmes 500 vendeve të reja pune në Pashaliman.
TIRANË — Kryeministri Edi Rama deklaroi se partneriteti mes kompanisë italiane "Fincantieri" dhe kompanisë shtetërore së Ministrisë së Mbrojtjes, "Kayo", do të krijojë rreth 500 vende të reja pune. Këto pozicione janë të destinuara për teknikë, inxhinierë dhe specialistë të teknologjisë së informacionit në bazën e re prodhuese.
Sipas Ramës, ky projekt përfaqëson një hap strategjik për fuqizimin e mbrojtjes dhe ringritjen e industrisë ushtarake në vend. Ai e cilësoi këtë proces si një kapitull të ri në historinë e Forcave të Armatosura, duke theksuar se investimi shkon përtej thjesht ndërtimit të infrastrukturës.
Për të siguruar stafin e kërkuar, partneriteti është zgjeruar edhe me shkollën industriale "Pavarësia" në Vlorë. Procesi i trajnimit të të rinjve të përzgjedhur nga "Fincantieri Albania" do të nisë paralelisht me ndërtimin e kantierit të ri detar në Pashaliman, për të përgatitur krahun punëtor.
Trajnimi i specialistëve do të zhvillohet në dy faza, duke përfshirë praktikë në Pashaliman dhe në kantierin mëmë të kompanisë italiane në brigjet e Italisë. Ky model synon transferimin e ekselencës teknologjike italiane në industrinë detare shqiptare.
Burim: ATSH
— Redaksia ZHURMA