QMK njofton 31 zjarre në 24 orë, pesë ende aktive

Qendra për Menaxhim me Kriza (QMK) ka regjistruar 31 zjarre në hapësira të hapura të Maqedonisë së Veriut gjatë periudhës 28–29 gusht, me referencën orare 07:30. Nga këto, pesë zjarre qëndrojnë ende aktive, një është vënë nën kontroll, ndërsa 25 janë shuar plotësisht.

Situata më kritike shfaqet në territorin e komunave të Studeniçanit dhe Zelenikovës, ku po digjet pyll i përzier në zonën Moranë–Vërtekicë–Ramni Gaber, me degëzim drejt Paligradit dhe Presllapit. Zjarri aktiv pranë Kopanicës, në Komunën e Sarajit, po përhapet drejt Radushës duke përfshirë bimësi të ulët dhe pyje. Të tilla janë edhe zjarret mbi fshatin Nezhilovë (Komuna e Çashkës), pranë Kopancës (Komuna e Jegunovcës) dhe në zonën e fshatit Cërnilishtë (Komuna e Prilepit).

Zjarri që shpërtheu pranë Tërnovës (Komuna e Gostivarit) dhe u përhap drejt Bitovës, Zagradit dhe Strajanës (Komuna e Makedonski Brodit) është tashmë nën kontroll. Gjatë 24 orëve të fundit janë shuar 25 zjarre në disa komuna, midis tyre Strumica, Ohri, Prilep, Shtip, Tetova, Gostivar, Dellçeva dhe Berova. QMK vazhdon monitorimin dhe apelon për kujdes të shtuar për shkak të rrezikut të përhapjes së zjarreve.