Qilimat e grave artizane ekspozohen në pasurinë e konfiskuar nga krimi

TIRANË — Ekspozita “Thurja e Qilimave”, e cila prezanton punimet artizanale të realizuara nga gratë e sipërmarrjes sociale “Tradita ime Artizanale”, është çelur sot në Tiranë. Ky aktivitet po zhvillohet në ambientet e Publik Galeri në rrugën “Hasan Alla”, një qendër e dedikuar artit dhe komunitetit, e cila është ngritur në një pasuri të konfiskuar nga shteti.

Ky aktivitet krijon një lidhje domethënëse mes dy pasurive të konfiskuara që sot i shërbejnë interesit publik. E prima ndodhet në qytetin e Elbasanit, ku prej vitesh zhvillon aktivitetin e saj sipërmarrja sociale prodhuese “Tradita ime Artizanale”, ndërsa e dyta ndodhet në Tiranë, ku po ekspozohen këto punime.

Kryeadministratorja e AAPSK-së, Risena Xhaja, deklaroi se ky projekt është një shembull konkret i filozofisë së re të administrimit të pasurive. Sipas saj, asetet e përfituara nga aktiviteti kriminal nuk duhet të mbeten të ngrira, por të rikthehen në funksion të komunitetit.

Drejtuesi i Fondacionit Joscelyn, Saimir Bakalli, nënvizoi se ekspozita synon të sjellë në vëmendje jo vetëm mjeshtërinë e thurjes, por edhe historitë e grave artizane. Qëllimi kryesor është që ruajtja e këtij arti të kthehet në të ardhura të qëndrueshme për këto familje që punojnë me talent dhe përkushtim.

Koleksioni i prezantuar përfshin qilima, sixhade dhe punime të tjera që ruajnë motive të trashëgimisë kulturore shqiptare të përcjella ndër breza. Kjo ekspozitë do të qëndrojë e hapur deri më 4 shtator 2026, në ambientet e Publik Galeri, nga e hëna në të premte, me orar 09:00 deri në 17:00.

Ky bashkëpunim i suksesshëm ndërmjet institucioneve publike dhe organizatave të shoqërisë civile dëshmon se pasuritë e përfituara nga veprimtaria kriminale mund të shndërrohen në hapësira që promovojnë artin dhe krijojnë mundësi ekonomike. Kjo iniciativë përfaqëson modelin e ri që AAPSK synon të zgjerojë në të gjithë vendin.

Burim: Top Channel
— Redaksia ZHURMA