QIKA kërkon shkarkimin e gjyqtarit Migjen Kastrati

Qendra për Informim, Kritikë dhe Aksion ka zhvilluar të hënën një aksion para Këshillit Gjyqësor të Kosovës, duke kërkuar shkarkimin e gjyqtarit Migjen Kastrati pas vrasjes së Arlinda Zekajt. Aktivistet vendosën vija të kuqe para objektit institucional dhe protestuan nën moton «Dy metra nuk janë mbrojtje», ndërsa organizata ka paraqitur katër kërkesa zyrtare, duke përfshirë nisjen e procedurave disiplinore dhe hetimin e përgjegjësisë së të gjithë zyrtarëve gjyqësorë të përfshirë.

Siç raportoi Zhurma më 2 nëntor 2026, vrasja e Arlinda Zekajt në fshatin Vitomiricë të Pejës nxori në pah dështimin e institucioneve të sigurisë dhe drejtësisë, duke shkaktuar reagime dhe protesta të shumta në vend.

Sipas organizatës, gjyqtari Migjen Kastrati kishte caktuar një distancë prej vetëm dy metrash mes viktimës dhe bashkëshortit të saj si masë mbrojtëse, vendim ky që u cilësuar si i pamjaftueshëm. Në reagimin e publikuar, QIKA theksoi se «Dy metra. Kaq ishte distanca që gjyqtari Migjen Kastrati e konsideroi të mjaftueshme për ta mbrojtur Arlinda Zekajn nga dhuna brenda shtëpisë së saj». Organizata iu referua një raporti të Ministrisë së Drejtësisë, sipas të cilit Gjykata Themelore në Pejë kishte shkelur afatet ligjore, pasi një procedurë që duhej të përfundonte brenda shtatë ditëve ishte zvarritur për më shumë se një muaj.

Sipas të dhënave të bëra publike, Arlinda Zekaj e kishte kundërshtuar vendimin fillestar më 9 shtator, kurse aktvendimi ishte nxjerrë më 16 tetor. Më 17 shtator, ajo i ishte drejtuar kryetarit të Gjykatës Themelore në Pejë, Shemsedin Haxhijaj, duke paralajmëruar për vonesat dhe rrezikun, ndërsa përgjigjen e kishte marrë më 20 tetor se gjyqtari kishte vepruar brenda afateve. Po ashtu, më 20 dhe 21 tetor, Qendra për Punë Sociale e kishte njoftuar gjyqtarin se urdhri mbrojtës nuk po zbatohej, por sipas raportit ministror nuk kishte pasur veprime të mëtejshme.

Këshilli Gjyqësor i Kosovës ka kryer një inspektim dhe ka publikuar një komunikatë, por sipas QIKA-s ende nuk ka dhënë përgjigje për përgjegjësinë disiplinore lidhur me shkeljet dhe mosveprimet e pretenduara ndaj gjyqtarit Kastrati dhe kryetarit Shemsedin Haxhijaj.