Qeveria e Maqedonisë së Veriut formon Komitetin për Sigurinë e Gazetarëve

Qeveria e Maqedonisë së Veriut ka miratuar vendimin për themelimin e Komitetit Kombëtar për Mbrojtjen dhe Sigurinë e Gazetarëve, me qëllim që të përmirësohet siguria e punonjësve të mediave, të parandalohen kërcënimet dhe të sigurohen kushte për ushtrimin e lirë e profesional të gazetarisë. Zëdhënësja e Qeverisë, Marija Miteva, deklaroi se ky vendim vendos një mekanizëm të organizuar për koordinim ndërmjet institucioneve shtetërore dhe organizatave mediatike.

Sipas njoftimit zyrtar, komiteti i ri do të ketë për detyrë të monitorojë sigurinë e gazetarëve, të forcojë bashkëpunimin ndërinstitucional dhe të përgatisë Planin Kombëtar të Veprimit më së voni deri më 15 dhjetor 2026, në përputhje me standardet evropiane. Ky plan do të mbështetet në katër shtylla kryesore: parandalimin, mbrojtjen, ndjekjen efektive penale të kryerësve dhe edukimin. Po ashtu, do të përfshijë mekanizma për reagim të shpejtë, mbështetje policore e juridike, si dhe mbrojtje nga sulmet në hapësirën digjitale.

Miteva theksoi se institucionet kanë detyrim të veprojnë me kohë dhe të mos merren me sigurinë e gazetarëve vetëm kur ndodh ndonjë incident. «Ju keni të drejtë të parashtroni pyetje, ndërsa ne kemi detyrim të përgjigjemi. Ju keni të drejtë ta vini në pikëpyetje punën e institucioneve, ndërsa ne kemi detyrim ta arsyetojmë atë», u shpreh ajo, duke shtuar se trupi i ri do të ndihmojë edhe në zbatimin e fushatës së Këshillit të Evropës «Gazetarët kanë rëndësi».