Pse po vazhdojnë punimet në rrugën Kijevë–Zahaq?
Ministri Basha thotë se një nga pikat që aktualisht po shkakton vonesa në trafik është bajpasi te Ura e Dollcit, i krijuar për shkak të minimit të asaj pjese të rrugës
Ministri në detyrë i Infrastrukturës dhe Transportit, Dimal Basha, ka bërë të ditur se punimet në segmentin rrugor Kijevë–Zahaq po vazhdojnë, ndërsa një nga pikat që aktualisht po shkakton vonesa në qarkullim pritet të lirohet brenda shtatë ditësh.
— Përmes një postimi në Facebook, Basha njoftoi se ka inspektuar nga afër ecurinë e punimeve, duke pranuar se ndërhyrjet në këtë segment kanë shkaktuar pengesa të përkohshme për qytetarët, bizneset dhe pjesëmarrësit në trafik.
— Ai ka sqaruar se një nga pikat kryesore që po ndikon në qarkullim është bajpasi te Ura e Dollcit, i krijuar për shkak të punimeve të minimit në atë pjesë të rrugës.
— Sipas ministrit në detyrë, gjatë vizitës janë diskutuar edhe sfidat teknike që po shoqërojnë realizimin e projektit, ndërsa është kërkuar rritja e dinamikës së punimeve.
— Ky segment rrugor do të ketë rritje të intensitetit dhe një dinamikë edhe më të mirë të punimeve, ka theksuar Basha.
— Në fund, ai u ka kërkuar ndjesë qytetarëve për vonesat e krijuara në trafik, duke siguruar se institucionet dhe operatorët janë duke punuar për t'i adresuar problemet sa më shpejt.
— Burim: Telegrafi, IndeksOnline
— Redaksia ZHURMA