Pse VLEN-i pret të forcohet pas rikonstruimit të Qeverisë?

TETOVË — Bashkëkryetari i VLEN-it, Izet Mexhiti, konfirmoi se po zhvillohet procesi i vlerësimit të punës së ekzekutivit në kuadër të rikonstruimit të Qeverisë së Maqedonisë së Veriut. Në deklaratën e tij për Zyrtare.net, Mexhiti theksoi se janë mbajtur takime me partnerët e koalicionit qeverisës, VMRO-DPMNE dhe ZNAM.

“Po bëhet vlerësimi i të gjithë ministrave dhe dikastereve. VLEN-i nga ky rikonstruim do të dalë shumë më i fuqishëm, me shumë më tepër potencial politik”, tha ai. Mexhiti sqaroi se qëllimi kryesor i këtij procesi është dinamizimi i punës së ekzekutivit dhe përshpejtimi i realizimit të premtimeve zgjedhore të partisë.

Sipas disa mediave, rikonstruimi i qeverisë po shihet si një mundësi për të rregulluar tensionet brenda koalicionit, veçanërisht pas bllokimeve të fundit në reformat kryesore. Akuzat e fundit për bllokim të reformave kanë rritur presionin për ndryshime.

Burim: Tetova Sot, Zyrtare.net
— Redaksia ZHURMA