Pse Vjosa Osmani i quan 'fatale' vendimet e lidershipit të atëhershëm të LDK-së?

PRISHTINË — Ish-Presidentja e Kosovës, Vjosa Osmani, ka deklaruar se nuk e ka braktisur kurrë elektoratin e Lidhjes Demokratike të Kosovës (LDK), duke e atribuar largimin e saj nga partia vendimeve të "lidershipit të atëhershëm". Osmani theksoi se qëndron ende pas kritikave që kishte adresuar në atë periudhë dhe se nuk është penduar për pozicionet e saj.

"Jo, Vjosa Osmani nuk e ka braktisur kurrë elektoratin e LDK-së. Elektorati i LDK-së nuk është që janë lidhur me emra, elektorati i LDK-së janë larguar në vitin 2020 për shkak të gabimeve fatale që i ka bërë atëherë lidershipi i atëhershëm i LDK," tha ajo në emisionin "Debat Plus". Osmani shtoi se nuk do të kërkojë falje për mbështetjen e premtimeve para elektoratit, pavarësisht se këto qëndrime i kushtuan përjashtimin nga partia.

Ish-kryetari i LDK-së, Isa Mustafa, ka refuzuar të komentojë deklaratat e Osmanit, duke i cilësuar si "të pavlera" dhe pa relevancë aktuale. "Më duket e kotë të merrem me të; si të merrem me borën e vitit të kaluar," deklaroi Mustafa për Lajmi.net.

Osmani foli gjithashtu për akuzat dhe etiketimet ndaj saj në skenën politike, duke theksuar se nuk do të lejojë askënd ta quajë me terma që ajo i konsideron të pavërteta. "Dhe nuk do të lejojë kurrë, asnjëherë askush [...] të dalë dhe të më shpallë mua tradhtare apo shitëse të territorit të vendit tim," deklaroi ajo, duke shtuar se për këto shpifje do të angazhohen institucionet e drejtësisë.

Kujtojmë se në vitin 2022, Mustafa kishte mohuar ekzistencën e ndonjë marrëveshjeje për ta bërë Osmanin kryetare të LDK-së. Në vitin 2019, disa javë para zgjedhjeve parlamentare të 6 tetorit, Osmani ishte zgjedhur kandidate për kryeministre e LDK-së, ndërsa Mustafa për një mandat të tretë si kryetar. Mustafa kishte deklaruar se ky ishte konsensusi i partisë dhe se nuk kishte marrëveshje të fshehta.

"Nuk ka pasur asnjë marrëveshje. Kam thënë se nuk mund të marr këtë përgjegjësi. Do të ishte pengesë e punës së partisë," kishte thënë Mustafa në T7, duke shtuar se ishte detyruar të vazhdonte mandatin dhe se ishte dakorduar që nëse nuk mund të vazhdonte, të merrej dikush tjetër, si Osmani ose Lutfi Haziri.

LDK-ja u rendit e treta në zgjedhjet e parakohshme parlamentare të 7 qershorit 2026, me 16.69% të votave dhe 18 ulëse në Kuvend, sipas rezultateve zyrtare të Komisionit Qendror të Zgjedhjeve.

Burim: Lajmi.net
— Redaksia ZHURMA