Pse s'mbyllet dot Kapitulli 27 pa zgjidhur Zvërnecin?

TIRANË — Bashkëkryetarja e të Gjelbërve Evropianë, Vula Tsetsi, i bëri thirrje kryeministrit Edi Rama të dëgjojë kërkesat e protestuesve. E shoqëruar nga eurodeputetë të Partisë së të Gjelbërve, ajo tha për "News 24" se erdhi në Shqipëri për të marrë pjesë në protestë, si një sinjal "i rëndësishëm për demokracinë".

Sipas Tsetsit, protesta qytetare — tashmë në javën e katërt — është "një test për demokracinë dhe sundimin e ligjit". Ajo kërkoi që Komisioni Evropian të jetë "shumë i qartë" për çfarë po ndodh, duke nënvizuar se "liria e medias është një termometër i demokracisë".

Protesta nisi si reagim kundër projektit në Zvërnec, por kaloi shpejt në kërkesën për dorëheqjen e Ramës dhe qeverisë. Tsetsi e quajti këtë "moment krize dhe mungese besimi", duke theksuar se pas 30 vitesh, dalja e qytetarëve në rrugë "duhet marrë shumë seriozisht".

Ajo kritikoi qasjen e kryeministrit, që sipas saj e trajton protestën si "ndërhyrje të huaja" apo përpjekje "për të shkatërruar vendin". Nga sa kishte kuptuar, tha Tsetsi, "nuk ka konsultim publik, nuk ka transparencë, nuk ka përgjegjësi" në vendimmarrjen për zonën.

Për Zvërnecin — "një parajsë për flamingot dhe zogjtë" — Tsetsi ishte kategorike: "Nuk ka asnjë mënyrë për të mbyllur kapitullin 27 pa zgjidhur këtë çështje." Parlamenti Evropian e ka ngritur shqetësimin për zonat e mbrojtura në rezolutën e fundit për Shqipërinë.

Ajo refuzoi logjikën e "punës si zakonisht" dhe të rishikimit të mëvonshëm të ligjit të 2024-ës, duke paralajmëruar se situata nuk do të përfundojë "pa pasoja të qarta" për Kapitullin 27 dhe për perspektivën e anëtarësimit të Shqipërisë në Bashkimin Evropian.

Thirrja e saj shkoi edhe te "familja politike" e Ramës, Socialdemokratët evropianë, ku ai bën pjesë si anëtar i asociuar: "Demokracia dhe përgjegjësia nuk janë 'a la carte'." Reformat, tha Tsetsi, janë të nevojshme dhe nuk duhen injoruar.

Burim: BalkanWeb
— Redaksia ZHURMA