Pse simptomat e infarktit tek gratë quhen 'atipike'?

EDINBURG — Një studim i ri i botuar në "Journal of the American Heart Association" (JAHA) tregon se etiketimi i simptomave të infarktit tek gratë si "atipike" mund të pengojë diagnostikimin dhe trajtimin e shpejtë. Hulumtimi, i kryer nga studiues të Universitetit të Edinburgut dhe mjekë të Shërbimit Shëndetësor "NHS Lothian" në Skoci, thekson se ky përshkrim krijon përshtypjen se simptomat janë më pak të rëndësishme, ndonëse janë po aq të shpeshta sa tek burrat.

Studimi analizoi pacientë me sindromë akute koronare dhe zbuloi se dhimbja në gjoks ishte po aq e zakonshme tek gratë (92%) dhe burrat (91%). Dallimi kryesor qëndron në simptoma shtesë tek gratë, si gulçim, lodhje të madhe, djersitje, të përziera dhe dhimbje në nofull ose shpinë. Këto kombinime mund të çojnë në vonesa në diagnostikim, pasi shpesh keqinterpretohen.

Autorët e studimit theksojnë se përdorimi i termit "atipike" është i gabuar, sepse nënkupton se simptomat janë më pak tipike ose serioze. Në fakt, ato janë po aq të rëndësishme dhe kërkojnë reagim të menjëhershëm. Rreziku kryesor nuk është vetë simptomat, por mënyra se si interpretohen dhe trajtohen nga mjekët.

Simptoma si presioni në gjoks, vështirësia në frymëmarrje, të përziera ose dhimbja në nofull dhe shpinë duhet të trajtohen me seriozitet të plotë, pavarësisht gjinisë. Ndërgjegjësimi i mjekëve dhe publikut mund të shpëtojë jetë, duke shmangur vonesa fatale në trajtim.

Studimi bën thirrje për ndryshimin e terminologjisë mjekësore, duke sugjeruar që simptomat e infarktit tek gratë të mos quhen më "atipike", por të trajtohen si variante të zakonshme të së njëjtës sëmundje.

Burim: ATSH, Journal of the American Heart Association
— Redaksia ZHURMA