Pse rikthimi i Thaçit dhe Veselit do ta 'fuqizojë' PDK-në?

PRISHTINË — Kryetari i Partisë Demokratike të Kosovës (PDK), Bedri Hamza, ka deklaruar se rikthimi në Kosovë i ish-presidentit Hashim Thaçi dhe ish-kryetarit të Kuvendit, Kadri Veseli, do ta 'fuqizojë' partinë dhe do t'i japë mundësi për rezultate më të mira në zgjedhjet e ardhshme.

Në emisionin 'Rubikon' në Klan Kosova, Hamza tha se pret një vendim lirues për ish-krerët e PDK-së, duke e cilësuar shtyrjen e aktgjykimit për në shtator si 'të padrejtë'. 'Ne presim, edhe pse në mënyrë të padrejtë u shty vendimi për në shtator, ne presim që liderët tanë... s’ka asnjë logjikë dhe as fakt, përveç që të ketë një vendim lirues', tha ai.

Hamza nuk paragjykoi nëse Thaçi dhe Veseli do të rikthehen në politikë, duke theksuar se ata 'asnjëherë nuk i kanë shprehur një synim të tillë'. 'Unë nuk mund të paragjykoj se a do të merren ata me politikë, është në të drejtën e tyre. Asnjëherë me mua nuk e kanë thënë që do të jenë pjesë e politikës', deklaroi ai. Megjithatë, vetë prania e tyre, sipas Hamzës, do të ndikonte pozitivisht në partinë.

'Partia Demokratike e Kosovës kalon në një nivel tjetër të mundësisë që të ketë rezultat më të mirë sesa që e ka pasur në zgjedhjet e fundit', tha Hamza, duke lënë të kuptohet se rikthimi i dy figurave historike mund të jetë një lëvizje strategjike për të rimëkëmbur besimin e votuesve. Burim: Telegrafi
— Redaksia ZHURMA