Pse projekti i gazifikimit të thëngjillit në Kosovë quhet 'i vdekur'?

PRISHTINË — Eksperti i energjisë, Adhurim Haxhimusa, ka vlerësuar se projekti për gazifikimin e thëngjillit në Kosovë është "i vdekur hiç pa filluar", duke theksuar se institucionet nuk kanë sqaruar mjaftueshëm këtë çështje, duke lënë hapësirë për spekulime.

Në emisionin "Info Magazine", Haxhimusa ka deklaruar se deklaratat e ministres së Ekonomisë, Artane Rizvanolli, kanë hedhur dritë mbi disa elemente, por kanë ngritur edhe dilema të reja për drejtimin e qeverisë në sektorin e energjisë. Ai ka theksuar se gazifikimi i thëngjillit nuk është i realizueshëm as teknikisht, as ekonomikisht.

"Një projekt i tillë ekonomikisht nuk është i mundur, financiarisht nuk është i mundur. Gazi që do të prodhohej nga thëngjilli nuk do të ishte konkurrues me gazin amerikan apo çfarëdo gazi tjetër", ka thënë Haxhimusa. Ai ka shtuar se çmimi i gazit nga thëngjilli do të ishte më i lartë se ai i importuar, duke e bërë të pamundur konsumin e tij.

Projekti bie ndesh edhe me rregullativat e reja të Bashkimit Evropian për mbrojtjen e mjedisit. Haxhimusa ka shpjeguar se kjo e bën të vështirë sigurimin e financimit, pasi institucionet financiare ndërkombëtare kanë mbyllur dyert për projekte që përdorin thëngjillin si burim energjie.

"Në aspektin ambiental, një projekt i tillë është në kundërshtim me rregullativat e BE-së. Prandaj, është shumë vështirë të gjesh fonde nga BE për të financuar një projekt të tillë, i cili kërkon miliarda euro", ka shtuar ai. Kjo është arsyeja kryesore që edhe projekti "Kosova e Re" dështoi.

Haxhimusa ka theksuar se edhe bankat me rëndësi kanë refuzuar të financojnë projekte të tilla, duke e bërë të pamundur realizimin e gazifikimit të thëngjillit. Ai ka vlerësuar se deklaratat e Rizvanollit kanë lënë më shumë pyetje se sa përgjigje për strategjinë e qeverisë në sektorin e energjisë.

Eksperti ka kërkuar më shumë transparencë nga institucionet, duke theksuar se spekulimet rriten kur nuk ka sqarime të mjaftueshme. Ai ka vlerësuar se Kosova duhet të fokusohet në burime energjie më të qëndrueshme dhe konkurruese.

Burim: Ekonomia Online
— Redaksia ZHURMA