Pse policia përdori gaz lotsjellës pa paralajmërim në protestën e 2 Korrikut?

TIRANË — Komiteti Shqiptar i Helsinkit (KSHH) ka denoncuar përdorimin e dhunës joproporcionale nga Policia e Shtetit gjatë protestës së 2 Korrikut para Kuvendit të Shqipërisë. Sipas monitorimit të KSHH, protesta kishte karakter kryesisht paqësor dhe situata ishte nën kontroll për një kohë të gjatë, por aktet e dhunshme të disa individëve nuk mund të atribuohen të gjithë protestuesve.

Reagimi i KSHH thekson se pas incidentit me automjetet që tentuan të dilnin nga ambientet e Kuvendit, sjellja e policisë ndryshoi menjëherë. Brenda një kohe të shkurtër, forcat e rendit kaluan nga një situatë e qetë në rrethim, shtyrje dhe përdorim të gazit lotsjellës ndaj protestuesve. Juristët e KSHH e shohin si tejet shqetësues mungesën e paralajmërimeve publike para përdorimit të dhunës.

"Përdorimi i gazit lotsjellës nuk u parapri nga një paralajmërim publik me qendër zëri dhe as nga dhënia e një kohe të arsyeshme për shpërndarje vullnetare," shkruan KSHH. Kjo masë, sipas tyre, prek në mënyrë të padiferencuar protestuesit paqësorë, gazetarët, vëzhguesit dhe persona të tjerë të pranishëm, duke u konsideruar si masë e fundit dhe proporcionale vetëm në raste ekstreme.

KSHH vuri në pah edhe përdorimin e forcës ndaj personave që ishin neutralizuar dhe ndodheshin në tokë, ku policia vazhdoi të përdorte shkopinj gome, goditje dhe grushta. Komiteti i bën thirrje protestuesve të distancohen nga dhuna, ndërsa Prokurorisë pranë Gjykatës së Shkallës së Parë Tiranë dhe Agjencisë së Mbikëqyrjes Policore t’u kërkon hetime të shpejta, të paanshme dhe efektive për çdo pretendim të dhunës joproporcionale.

Burim: Report Tv
— Redaksia ZHURMA