Pse po presin me orë të tëra shoferët në aksin Gostivar-Strazhë?
Shoferët e bllokuar në rrugën drejt Strazhës kërkojnë praninë e policisë për të rregulluar komunikacionin pas pritjeve deri në një orë.
GOSTIVAR — Pasditen e së premtes, më 19 qershor, janë krijuar kolona kilometrike në aksin rrugor Gostivar–Strazhë, ku drejtuesit e automjeteve raportuan pritje deri në një orë pranë semaforëve. Sipas dëshmive të qytetarëve, bllokada e krijuar është aq e madhe saqë pritja në rrugë është bërë më e gjatë se në disa pika kufitare.
Shoferët e revoltuar njoftuan se e kanë raportuar gjendjen e rënduar në polici, duke kërkuar ndërhyrje urgjente për rregullimin e trafikut. Edhe pse morën premtime se një ekip do të dërgohej në terren, deri në momentin e publikimit të pamjeve, nuk kishte asnjë prani policore në vendngjarje.
Këto kolona të gjata nuk janë rast i izoluar, por një dukuri e zakonshme çdo të premte pasdite dhe të dielën, kur mijëra automjete lëvizin drejt qendrave turistike. Qytetarët paralajmërojnë se pa ndërhyrje konkrete institucionale, ky kolaps i komunikacionit do të vazhdojë gjatë tërë sezonit veror.
Burim: Tetova Sot
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.