Gjorgjioski dërgohet në paraburgim 30-ditor për abuzimet në FFM

SHKUP — Gjykata Penale e Shkupit ka caktuar masën e paraburgimit prej 30 ditësh për tre persona dhe arrest shtëpiak për pesë të tjerë, të dyshuar për përvetësim të parave në Federatën e Futbollit të Maqedonisë. Në mesin e të paraburgosurve është edhe ish-kryetari i federatës, Ilço Gjorgjioski.

Së bashku me ish-kryetarin Gjorgjioski, në paraburgim do të qëndrojnë edhe dy të dyshuar të tjerë me inicialet O.M. dhe Gj.Ç. Ndërkaq, Gjykata Penale vendosi masën e arrestit shtëpiak për pesë të dyshuar, të identifikuar si N.L., I.P., I.Sh., S.T. dhe K.A.

Për katër të arrestuarit e tjerë, të identifikuar si T.P., J.D., D.J. dhe E.N., trupi gjykues ka caktuar masa kujdesi. Gjykata Penale po ashtu sqaroi se pritet të vendosë shtesë për masat ndaj pesë personave të cilët aktualisht ndodhen në arrati.

Aksioni i gjerë i Prokurorisë për Ndjekjen e Krimit të Organizuar ka përfshirë gjithsej 18 persona, prej të cilëve 12 janë arrestuar gjatë bastisjeve në lokacione të ndryshme në Shkup. Prokurorët kishin kërkuar paraburgim për tetë persona dhe masa kujdesi për katër të tjerët.

Të gjithë të dyshuarit ngarkohen për përvetësim të mbi 180 milionë denarëve, apo rreth 2.4 milionë eurove, nga buxheti i federatës. Ky hetim shumëvjeçar u finalizua dje me kontrolle në shtëpi dhe zyra, të koordinuara me Policinë Financiare dhe Ministrinë e Punëve të Brendshme.

Ky rast pason arrestimin e Muamed Sejdinit në prill për përvetësim në stadiumin e Ohrit. Aksioni i fundit vjen pas kallëzimit penal ndaj tre punonjësve të FFM-së, si dhe drejtuesve dhe pronarëve të subjekteve juridike që dyshohet se ndihmuan në përvetësimin e këtyre fondeve.

Burim: TV21
— Redaksia ZHURMA