Pse po anulohen rezervimet turistike në Vlorë?
Bizneset e akomodimit në jug shprehin shqetësim se protestat e fundit po dëmtojnë imazhin e Shqipërisë dhe po nxitin anulimin e rezervimeve.
VLORË — Sezoni turistik në qytetin e Vlorës ka nisur me një rritje prej 13% gjatë muajve mars, prill dhe maj, krahasuar me të njëjtën periudhë të vitit të kaluar. Megjithëse fillimi ishte pozitiv, operatorët turistikë po shprehin shqetësim për anulimet e fundit të rezervimeve nga të huajt.
Kreu i operatorëve turistikë të jugut, Vasil Bedinaj, deklaron se çdo perceptim negativ apo pasiguri mbi vendin ndikon drejtpërdrejt te vizitorët e huaj. Sipas bizneseve, protestat e vazhdueshme rrezikojnë të dëmtojnë jo vetëm industrinë e mikpritjes, por edhe sektorët e tjerë të lidhur me ekonominë.
Nga ana tjetër, turistët që ndodhen tani në Vlorë tregojnë qëndrime të ndryshme. Disa vizitorë nga Polonia sqarojnë se ishin informuar për organizimet para se të mbërrinin, mirëpo kjo nuk i ka penguar ta vizitojnë Shqipërinë dhe nuk ndihen të kërcënuar apo të rrezikuar.
Megjithëse situata e krijuar së fundmi sjell një perceptim jo plotësisht pozitiv jashtë vendit, pritshmëritë e operatorëve për këtë sezon veror mbeten ende optimiste. Sektori synon të përsërisë suksesin e vitit të shkuar rekord, kur Shqipëria u vizitua nga më shumë se 12 milionë turistë të huaj.
Burim: Telegrafi
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.