Pse PDK-ja refuzon përkrahje bllanko për qeverinë e re?
Çfarë kushte parashtron Bedri Hamza për të mbështetur një koalicion?
PRISHTINË — Kryetari i Partisë Demokratike të Kosovës, Bedri Hamza, ka deklaruar se PDK-ja nuk do t’i japë dhe as nuk do t’i kërkojë askujt përkrahje politike pa kushte. Në një intervistë për emisionin „Rubikon“ të Klan Kosovës, Hamza theksoi se partia e tij ka kandidatë të përgatitur për të udhëhequr të gjitha institucionet e vendit.
„Unë e thashë qartë, PDK as nuk ia kërkon, as nuk ia jep askujt përkrahjen bllanko, po flas për përkrahje politike“, tha Hamza. Ai shtoi se çdo marrëveshje duhet të bazohet në kritere të qarta, jo në propozime arbitrare. „Nuk mundet kushdo që të dalë me propozu sipas kritereve të veta, e me e përkrahë PDK-ja“, deklaroi ai.
Hamza theksoi se PDK-ja ka „emra të mjaftueshëm, të përgatitur për të gjitha pozitat“ institucionale, të cilët mund të udhëheqin me sukses dhe përgjegjësi. Ai përmendi se partia ka dëshmuar këtë kapacitet edhe në të kaluarën, duke udhëhequr pozita si kryeministri, kryetari i Kuvendit, presidenti dhe ministrat.
„PDK-ja ka kapacitete të mjaftueshme“, tha Hamza, duke nënvizuar se çdo marrëveshje politike duhet të jetë e bazuar në parime dhe standarde të qarta, jo në mbështetje të pakushtëzuar.
Burim: Klan Kosova, klankosova.tv
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.