Pse LNG-ja amerikane është zgjidhja për sigurinë energjetike të Kosovës?

PRISHTINË — Oda Ekonomike Amerikane në Kosovë ka reaguar ndaj deklaratave të fundit të Qeverisë për politikën energjetike, duke theksuar se prioritetet aktuale nuk adresojnë nevojën për rritjen e kapaciteteve vendore të prodhimit të energjisë elektrike.

Sipas Odës, çështja nuk është nëse Kosova mund të importojë energji nga vendet fqinje, por nëse duhet të vazhdojë të mbështetet në import apo të investojë në kapacitete të reja prodhuese brenda vendit. Këto investime do të forconin sigurinë energjetike, konkurrueshmërinë ekonomike dhe pavarësinë strategjike të Kosovës.

Oda Amerikane vlerëson se importimi i energjisë elektrike ekspozon Kosovën ndaj luhatjeve të çmimeve dhe rreziqeve të furnizimit, të cilat nuk varen nga vendimmarrja e saj. Për shembull, kriza energjetike evropiane pas agresionit rus në Ukrainë tregoi se shtetet me kapacitete të mjaftueshme prodhuese ishin më të mbrojtura nga goditjet e tregut.

Në këtë kontekst, LNG-ja amerikane paraqet një alternativë të shpejtë dhe ekonomike për ndërtimin e kapaciteteve të reja gjeneruese. Studimet e Korpusit të Inxhinierëve të Ushtrisë së SHBA-së, në kuadër të programit MCC, kanë identifikuar ndërtimin e interkoneksionit të gazit përmes Maqedonisë së Veriut si opsionin më të favorshëm për furnizimin e Kosovës me gaz natyror.

Kapacitetet gjeneruese me bazë LNG mund të ndërtohen brenda dy deri në tre vjet dhe kanë mundësi më të mëdha për financim nga institucionet ndërkombëtare sesa projektet me bazë qymyr. Për më tepër, LNG-ja nuk është alternativë ndaj burimeve të ripërtëritshme, por teknologji që mundëson integrimin e energjisë nga era dhe dielli në sistemin elektroenergjetik.

Gazifikimi i qymyrit, megjithëse mund të diskutohet për sigurinë afatgjatë, nuk adreson nevojat urgjente të Kosovës për rritjen e kapaciteteve prodhuese. Projekti kërkon kohë më të gjatë dhe financim të pasigurt, duke pasur parasysh politikat ndërkombëtare për dekarbonizim.

Oda Amerikane rekomandon një qasje të dyfishtë: zhvillimin e kapaciteteve me bazë LNG për nevojat afatshkurtra dhe afatmesme, dhe vlerësimin paralel të opsioneve afatgjata. Kjo do të siguronte furnizim të qëndrueshëm dhe diversifikim të burimeve energjetike.

Burim: Ekonomia Online
— Redaksia ZHURMA