MINTI: Bie çmimi i naftës në Kosovë, nga 1.83 në 1.79 euro për litër

Çmimi mesatar i naftës në tregun vendor ka shënuar rënie nga 1.83 euro në 1.79 euro për litër gjatë 24 orëve të fundit, si pasojë e reflektimit të lëvizjeve në tregjet ndërkombëtare, sipas njoftimit të lëshuar nga Ministria e Industrisë, Ndërmarrësisë, Tregtisë dhe Inovacionit. Krahas kësaj uljeje, çmimi mesatar i benzinës ka arritur në 1.43 euro për litër në tregun kosovar.

Për të monitoruar situatën, Inspektorati Qendror i Mbikëqyrjes së Tregut ka intensifikuar kontrollet dhe aktivitetet inspektuese nëpër pikat e derivateve gjatë ditëve të fundit. Nga ky dikaster qeveritar bëhet e ditur se çdo ditë pranohen të dhëna zyrtare nga Dogana e Kosovës për çmimet e importit, të cilat shërbejnë për analizimin e lëvizjeve në treg.

Analiza e çmimeve mbështetet në tri referenca kryesore, duke përfshirë çmimin mesatar të furnizimit të ditës paraprake, çmimin mesatar të furnizimit të 10 milionë litrave të fundit të importuara dhe çmimin mesatar të shitjes me pakicë në tregun vendor. Autoritetet kanë paralajmëruar se monitorimi dhe inspektimet do të vazhdojnë edhe në ditët në vijim për të parandaluar çdo devijim dhe për të garantuar që ulja e kostove të reflektohet te konsumatorët.