Pse kuotat për magjistratë të rinj në Shqipëri janë të pamjaftueshme?

TIRANË — Komisioni Europian (KE) ka ngritur sërish shqetësimin për nivelin e ulët të kuotave për gjyqtarë dhe prokurorë në Shkollën e Magjistraturës në Shqipëri, duke i quajtur ato "të pamjaftueshme" për të adresuar sfidat e sistemit gjyqësor.

Në draftin konfidencial të raportit për vitin 2026, KE thekson se kuotat e përcaktuara nga Këshilli i Lartë i Gjyqtarëve (KLGJ) dhe Këshilli i Lartë i Prokurorëve (KLP) për vitin akademik 2026-2027 nuk mjaftojnë për të përmbushur nevojat e sistemit në afat të mesëm. KLGJ ka caktuar vetëm 10 kuota për gjyqtarë, 6 për ndihmës ligjorë në Gjykatat e Apelit dhe 35 për ndihmës ligjorë në Gjykatat e Shkallës së Parë, ndërsa KLP ka përcaktuar 7 kuota për prokurorë.

KE vë në dukje se këto kuota bazohen në një vlerësim të vendeve të lira aktuale, por nuk marrin parasysh nevojat e ardhshme të sistemit. "Rritja e numrit të magjistratëve është thelbësore," thekson raporti, duke shtuar se pozicionet e këshilltarëve ligjorë mbeten "shumë të kufizuara" krahasuar me nevojat e menjëhershme. Mungesa e burimeve njerëzore është një tjetër problem i theksuar, me vetëm 100 nga 219 punonjësit e kërkuar për vitin 2025 të miratuar nga Parlamenti.

Megjithëse në janar u miratuan ndryshime ligjore për të përmirësuar standardet e verifikimit të të dhënave dhe pasurisë për anëtarët jo-magjistratë në KLGJ dhe KLP, KE vëren se asnjë nga institucionet e përfshira nuk ka miratuar ende rregulloren e nevojshme për të zbatuar këto ndryshime. Kjo vonesë pengon kontributin në pavarësinë dhe profesionalizmin e këtyre këshillave, sipas raportit.

KE kërkon një plan gjithëpërfshirës për burimet njerëzore dhe rritjen e investimeve në sistemin e drejtësisë, pasi shpenzimet aktuale mbeten "të ulëta" dhe buxheti për burime shtesë nuk është rritur pavarësisht nga kërkesat e Këshillave.
Burim: Shqiptarja
— Redaksia ZHURMA