Pse komunitetet joshumicë refuzojnë një kandidat kontrovers për president?

PRISHTINË — Emilja Rexhepi, përfaqësuese e Partisë së Re Demokratike (NDS), ka deklaruar se komunitetet joshumicë do të jenë konstruktive në procesin e formimit të institucioneve, por nuk do të mbështesin një kandidat kontrovers për president.

Rexhepi theksoi se renditja e konstituimit të institucioneve ka mbetur e pandryshuar që nga viti 2009: së pari kryetari i Kuvendit, pastaj nënkryetarët, më pas qeveria dhe në fund presidenti. "Ne duam të jemi konstruktivë. Pavarësisht se nga cila parti vjen kandidati për kryeministër, nëse krijohen kushtet për formimin e institucioneve, unë do ta jap votën time," tha ajo në KlanKosova.

Sipas saj, sfida më e madhe mbetet zgjedhja e presidentit, pasi kërkohet prania e të paktën 80 deputetëve në sallë. "Është detyrë e të gjithëve që sa më shpejt ta konstituojmë Kuvendin, ta formojmë qeverinë dhe më pas ta zgjedhim presidentin," shtoi Rexhepi. Ajo vuri në dukje se presidenti duhet të jetë një figurë që bashkon të gjithë qytetarët, me vlera si ndershmëri, integritet dhe profesionalizëm.

"Nuk do ta mbështesim një kandidat kontrovers që cenon karakterin multietnik të Kosovës," theksoi Rexhepi. Procesi i zgjedhjes së presidentit do të vijojë vetëm pas konstituimit të Kuvendit dhe formimit të qeverisë.

Burim: Gazeta Express
— Redaksia ZHURMA