Kombëtarja niset drejt San Marinos pas seancës stërvitore në Tiranë
Përgatitjet e skuadrës kuqezi vazhdojnë për ndeshjen e dytë në UEFA Nations League pas ndeshjes me Bjellorusinë.
Puna te skuadra kuqezi vijon me intensitet pas sfidës së luajtur në stadiumin «Air Albania» kundër Bjellorusisë, ndërsa grupi ka zhvilluar një seancë në ambientet e «Shtëpisë së Futbollit» në kuadër të ndeshjes së dytë të UEFA Nations League. Ngarkesa e lojtarëve ka përcaktuar programin e ndjekur nga stafi teknik, ku pjesa e futbollistëve që u aktivizuan në sfidën e parë janë marrë me rikuperim, ndërsa pjesa tjetër e grupit ka kryer një program të plotë me ushtrime fizike, tekniko-taktike dhe skema loje.
Përfaqësuesja do të zhvillojë stërvitjen zyrtare në orën 11:00 përpara se të niset drejt San Marinos. Skuadra synon të përgatitë sa më mirë sfidën e radhës në këtë aktivitet zyrtar, duke u mbështetur te puna e kryer gjatë këtyre ditëve në ambientet stërvitore të FSHF-së.