Pse integrimi gradual në BE mund të bëhet 'dhomë pritjeje e përhershme' për Maqedoninë?

DUBROVNIK — Ministri i Punëve të Jashtme dhe i Tregtisë së Jashtme i Maqedonisë, Timço Mucunski, paralajmëroi se integrimi gradual në Bashkimin Evropian mund të shndërrohet në një "dhomë pritjeje të përhershme" nëse nuk shërben si urë drejt anëtarësimit të plotë.

Duke folur në Forumin e Dubrovnikut, Mucunski theksoi se modele të tilla janë të dobishme vetëm nëse garantojnë progres real drejt anëtarësimit. "Nëse bëhet vegël që krijon pritje pa derë drejt anëtarësimit, atëherë humb kuptimin," deklaroi ai, sipas Portalb.

Mucunski vlerësoi se iniciativat ekzistuese, si SEPA dhe Plani për Rritje, kanë sjellë përfitime konkrete për rajonin, duke nxitur reforma dhe mbështetje financiare. Megjithatë, ai kërkoi disiplinë më të madhe në procesin e zgjerimit, me standarde dhe afate më të qarta, si dhe një proces inkuadrimi më kredibël dhe të parashikueshëm.

Për çështjet e identitetit, ministri hodhi poshtë pretendimet për ekzistencën e një "populli maqedonas verior" ose "gjuhe maqedonase veriore", duke theksuar se ekziston vetëm një popull i Maqedonisë. Ai konfirmoi se shteti mbetet i harmonizuar me Politikën e Përbashkët të Jashtme dhe Sigurisë së BE-së.

Marrëdhëniet me Bullgarinë u vlerësuan si një mundësi për bisedime mbi çështjet e hapura, por Mucunski theksoi se qëllimi nuk është vetëm të fillojnë negociatat, por t’i përfundojnë me sukses. "Duhet t’i fillojmë dhe t’i përfundojmë në bazë të legjislacionit evropian dhe kritereve të Kopenhagës dhe Madridit," tha ai.

Ministri bëri thirrje për mbështetje më aktive nga vendet anëtare të BE-së në rajon, duke vlerësuar se integrimi evropian kërkon përpjekje të përbashkëta. Propozimi i kancelarit gjerman, Friedrich Merz, për statusin e vëzhguesit për Ballkanin Perëndimor u përmend si një mundësi për avancim gradual, por vetëm nëse shoqërohet me progres real.

Maqedonia e Veriut mbetet e bllokuar në rrugën drejt BE-së për shkak të mosmarrëveshjeve me Bullgarinë, veçanërisht për ndryshimet kushtetuese që kërkon BE-ja. Qeveria aktuale ka deklaruar se nuk do t’i zbatojë këto ndryshime, duke e lënë procesin në pikëpyetje.

Burim: Portalb
— Redaksia ZHURMA