Pse dhuna mes të rinjve në Maqedoni po normalizohet?
Pse dhuna mes të rinjve në Maqedoninë e Veriut po përsëritet?
SHKUP — Incidentet e dhunës mes të rinjve në Maqedoninë e Veriut kanë rritur shqetësimin për normalizimin e kësaj dukurie. Psikologët theksojnë se ndryshimet e papritura në sjelljen e fëmijëve mund të jenë shenjë se ata përjetojnë dhunë ose probleme në familje, dhe këto shenja nuk duhet të anashkalohen.
Sipas psikologut Safet Ballazhi, një nga sfidat kryesore është mungesa e përgjegjësisë së disa prindërve, të cilët shpesh mbrojnë fëmijët edhe kur ata shfaqin sjellje të dhunshme. "Prindërit jo vetëm që nuk i ndëshkojnë fëmijët, por madje i mbështesin dhe sulmojnë arsimtarët që identifikojnë problemin," tha Ballazhi. Ai vuri në dukje se ky "sindromë i të fortit" ndikon drejtpërsëdrejti në sjelljen e të rinjve, të cilët imitojnë sjelljet e të rriturve.
Emilija Boshkovska nga Oda e Psikologëve theksoi se mësuesit dhe bashkëpunëtorët profesionalë duhet të identifikojnë me kohë shenjat e ndryshimeve tek nxënësit. "Një fëmijë me sukses të mirë që papritur fillon të ketë ulje të performancës, vjen i lodhur ose me veshmbathje jo të duhur, janë tregues se diçka po ndodh," shpjegoi ajo. Këto shenja mund të tregojnë se fëmija ka nevojë për mbështetje.
Ministrja e Arsimit, Vesna Janevska, ka theksuar se pa angazhimin e familjes nuk mund të ketë luftë efektive kundër dhunës. Ajo vuri në dukje se shumë raste lidhen me neglizhimin e fëmijëve dhe mungesën e edukimit në familje. Institucionet do të vazhdojnë me takime dhe aktivitete sensibilizuese me prindërit dhe shkollat, ndërsa do të zbatohen edhe masa më të rrepta.
Ndërkohë, në procedurë parlamentare mbeten ndryshimet ligjore që parashikojnë gjoba financiare për prindërit dhe kujdestarët e fëmijëve që ushtrojnë dhunë mes bashkëmoshatarëve në shkollë. Këto masa synojnë të rrisin përgjegjësinë e të rriturve dhe të parandalojnë përhapjen e dhunës në mesin e të rinjve.
Psikologët kërkojnë që shkollat dhe familjet të bashkëpunojnë më ngushtë për të adresuar këtë problem, duke theksuar se edukimi dhe mbikëqyrja e duhur mund të zvogëlojnë incidentet e dhunës.
Burim: Alsat-M
— Redaksia ZHURMA