Pse Aida Çoroviq i këshillon studentët serbë të mos merren me Kosovën?
Aktivistja serbe për të drejtat e njeriut deklaron se Kosova është shtet i pavarur dhe sovran, duke i këshilluar studentët të vizitojnë vendin për të parë realitetin.
BEOGRAD — Aktivistja serbe për të drejtat e njeriut, Aida Çoroviq, ka deklaruar se studentët në Serbi nuk duhet të merren me çështjen e Kosovës, pasi Kosova është një shtet i pavarur dhe sovran. Ajo i fton ata që nuk pajtohen me këtë realitet të vizitojnë Kosovën për të parë situatën në terren.
“Studentët nuk duhet të merren me temën e Kosovës. Kosova është shtet i pavarur dhe sovran. Nëse dikujt nuk i pëlqejnë këto fjalë, atëherë le të shkojë në Kosovë. Aty e pret Policia e Kosovës, nuk mund të paguajë me dinarë dhe nuk funksionojnë më institucionet e Serbisë,” tha Çoroviq. Sipas saj, edhe Universiteti paralel i Prishtinës do të mbyllet, pasi asnjë institucion serb nuk funksionon më në Kosovë.
Çoroviq shtoi se ka miq serbë nga veriu i Kosovës, të cilët udhëtojnë në Novi Pazar dhe Rashkë për të tërhequr para, pasi bankomatët serbë nuk funksionojnë në Kosovë. “Problemi nuk janë deklaratat e mia, por fakti që disa njerëz nuk e pranojnë të vërtetën,” theksoi ajo. Aktivistja u bë e njohur pasi hodhi vezë në muralin e kriminelit të luftës Ratko Mlladiq në Beograd.
Burim: Telegrafi
— Redaksia ZHURMA