Pse 27 qershori mbetet 'dhimbja e madhe kombëtare' për shqiptarët?

KONISPOL — Varrezat Monumentale “Trëndafilat e Çamërisë” në Kllogjer u mbushën me pasardhës të familjeve çame, të mbijetuar të dëbimit, përfaqësues institucionesh dhe qytetarë nga Shqipëria e Kosova, të cilët u mblodhën për të përkujtuar 82-vjetorin e gjenocidit grek ndaj popullsisë shqiptare të Çamërisë.

Ceremonia, e organizuar nga Bashkia Konispol, nisi me homazhe pranë memorialit dhe një minutë heshtje për mijëra viktima. Kryetari i bashkisë, Erges Dule, e quajti Kllogjerin “vend pelegrinazhi për shqiptarët e Çamërisë” dhe theksoi se çështja çame “nuk është politikë, por detyrim moral për secilin prej nesh”.

Deputeti socialist Ardit Bido vlerësoi përparimin që përkujtimi organizohet tashmë nga një institucion shtetëror, por kërkoi që çështja të trajtohet si “dhimbje e të gjithë shqiptarëve, e majtëve dhe të djathtëve”. “U deshën 50 vjet që Shqipëria ta shpallte 27 qershorin Ditën e Gjenocidit ndaj Çamërisë”, tha ai.

Dëshmitë e të mbijetuarve ishin pjesa më emocionale. Një pjesëmarrëse kujtoi se nga nëntë anëtarë të familjes së saj, vetëm katër mbijetuan eksodin e vitit 1944. “Pesë fëmijë na vdiqën në një ditë. U nisën 9 veta, në Vlorë erdhën 4”, tregoi ajo. Një tjetër rrëfeu se familja e tij humbi 12 të afërm në varrezat e Kllogjerit.

Arta, një e re nga Kosova, bëri thirrje që viktimat të kujtohen çdo ditë, jo vetëm një herë në vit. “Unë jam çame. Mbaj emrin e Artës së Çamërisë. Ne kuptojmë dhimbjen e njëri-tjetrit. Apeloj që mos t’i harrojmë viktimat”, tha ajo. Përfaqësues nga Kosova theksuan se historia e Çamërisë është pjesë e kujtesës së të gjithë shqiptarëve.

Kryetari i PDIU-së, Shpëtim Idrizi, foli për përpjekjet për ndërkombëtarizimin e çështjes dhe kërkoi që shteti shqiptar të mbrojë të drejtat e shqiptarëve të Çamërisë. “Dosja diplomatike është e plotë. Kemi bërë shumë gurë kilometrikë në zgjidhjen e kësaj çështje”, tha ai. Ndërkohë, Tahir Muhedini, kryetar nderi i partisë, kërkoi ngritjen e një memoriali në Çamëri për viktimat.

Ceremonia përfundoi me vendosjen e kurorave dhe luleve pranë memorialit. Edhe pas 82 vitesh, Kllogjeri mbetet vendi ku rikthehen kujtimet e një prej kapitujve më të dhimbshëm të historisë shqiptare. Ish-deputeti Dashamir Tahiri akuzoi liderët e PDIU-së për “vjedhje të aktiviteteve” në përkujtim.

Burim: Shqiptarja
— Redaksia ZHURMA