PS kërkon përjashtimin e Sali Berishës dhe gjashtë deputetëve të PD-së

Partia Socialiste i është drejtuar Sekretariatit për Procedurat, Votimet dhe Etikën me kërkesë për masa disiplinore ndaj shtatë deputetëve të Partisë Demokratike, duke kërkuar përjashtimin me 10 ditë të kreut të opozitës Sali Berisha dhe 60 ditë për gjashtë ligjvënës të tjerë pas tensioneve të regjistruara gjatë seancës plenare në Kuvend.

Seanca parlamentare u shoqërua me bllokim të foltores, hedhje të tymuesve, flakadanëve dhe mjeteve piroteknike, si dhe përdorim të bilbilave dhe mjeteve fryrëse nga opozita, veprime që sollën ndërprerjen e punimeve dy herë radhazi për shkak të pamundësisë së vijimit të rendit të ditës.

Sipas kërkesës së paraqitur nga Partia Socialiste, masa disiplinore me 10 ditë përjashtim kërkohet për deputetin Sali Berisha për shkak të përdorimit të një fjalori joparlamentar dhe thirrjeve për akte dhune e nxitje të urrejtjes gjatë fjalës së tij për procedurë jashtë parashikimeve të Rregullores së Kuvendit. Ndërkohë, për gjashtë deputetët e tjerë të opozitës kërkohet masa më e rëndë prej 60 ditësh përjashtim nga pjesëmarrja në komisione dhe në seancë plenare, sipas njoftimeve të bëra publike pas seancës.

Në dokumentin e dorëzuar në Kuvend përfshihen emrat e gjashtë deputetëve të opozitës ndaj të cilëve kërkohet masa prej 60 ditësh, ku sipas burimeve zyrtare të bëra publike nga mediat pëfshihen Bledion Nallbati, Ivi Kaso, Xhelal Mziu, Klodiana Çapja, Albana Vokshi dhe Blendi Himçi, të cilët akuzohen nga mazhoranca për përdorim të lëndëve piroteknike dhe hedhje të sendeve të forta në drejtim të drejtuesit të seancës dhe anëtarëve të Këshillit të Ministrave.

Tashmë pritet shqyrtimi i kërkesave nga Sekretariati për Procedurat, Votimet dhe Etikën, për të marrë vendimin përfundimtar mbi masat disiplinore ndaj deputetëve të opozitës pas episodeve të fundit të shënuara në sallën e seancave plenare.