OKB miraton rezolutën kundër embargos ndaj Kubës me 130 vota

Asambleja e Përgjithshme e Kombeve të Bashkuara votoi të mërkurën, më 28 tetor, në favor të rezolutës që kërkon përfundimin e embargos ekonomike, tregtare dhe financiare të Shteteve të Bashkuara ndaj Kubës, me 130 vota pro, 17 kundër dhe 25 abstenime. Dokumenti u miratua në Nju Jork për të 34-tin vit radhazi.

Kjo rezolutë paraqitet çdo vit nga Kuba që prej vitit 1992. Embargoja amerikane ndaj ishullit të Karaibeve është vendosur në vitin 1962 dhe mbetet pika kryesore e përplasjes diplomatike mes dy vendeve. Në vitet 2004 dhe 2005, dokumenti kishte siguruar më shumë se 182 vota në favor. Një vit më parë, rezoluta mori mbështetjen e 165 vendeve, me shtatë vota kundër dhe 12 abstenime, ndërsa këtë herë shënoi numrin më të ulët të votave pro në më shumë se tri dekada.

Sipas autoriteteve kubaneze, votimi pasoi një fushatë të intensifikuar diplomatike dhe presion nga Uashingtoni për të bindur shtetet që ta kundërshtonin ose të abstenonin. Në tekstin e këtij viti u përfshi edhe një referencë ndaj pasojave të kufizimeve mbi furnizimin me naftë. Nga vendet e rajonit, Maqedonia e Veriut, Sllovenia dhe Bosnja e Hercegovina votuan kundër heqjes së sanksioneve. Kroacia dhe Shqipëria, përmes me ambasadoren e saj në OKB Suela Janinaj, abstenuan nga votimi, ndërsa Serbia votoi pro rezolutës.

Rezoluta nuk ka karakter ligjërisht detyrues dhe nuk e obligon Uashingtonin të ndryshojë politikën e tij të sanksioneve, por shërben si tregues i qëndrimeve ndërkombëtare. Autoritetet në Havana përllogaritin se dëmi ekonomik nga masat amerikane arriti në rreth 8 miliardë dollarë në periudhën nga marsi 2025 deri në shkurt 2026. SHBA-ja dhe Izraeli kanë mbajtur një qëndrim të vazhdueshëm kundërshtues ndaj dokumentit gjatë votimeve në Asamblenë e Përgjithshme.

Presidenti kubanez Miguel Díaz-Canel shkroi në rrjetin social X se bota votoi sërish kundër bllokadës pavarësisht shantazhit amerikan. Ministri i Jashtëm i Kubës, Bruno Rodríguez, deklaroi se bllokada ndëshkon popullsinë në heshtje dhe akuzoi SHBA-në se synon të kontrollojë pasuritë e vendit. Ambasadori amerikan në Kombet e Bashkuara, Mike Waltz, tha se vështirësitë e popullsisë janë pasojë e regjimit komunist dhe bëri me dije se nga janari deri në gusht u janë shitur kompanive private kubaneze mallra me vlerë 875 milionë dollarë, përfshirë karburant.