Juventusi nis kontaktet me Didier Deschamps për të zëvendësuar Luciano Spallettin

Klubi i Juventusit ka nisur kontaktet me ish-trajnerin e Francës, Didier Deschamps, për të marrë drejtimin e skuadrës në vend të Luciano Spallettit, pasi ky i fundit rrezikon shkarkimin pas humbjes 2-0 ndaj Genoas të mërkurën mbrëma. Me këtë disfatë, skuadra torineze ka mbetur në vendin e tetë në tabelën e Serie A pas nëntë xhirove të zhvilluara.

Pozita e teknikut italian është dobësuar ndjeshëm dhe drejtuesit e klubit kanë filluar kërkimin për një zëvendësues, sipas mediumit italian La Stampa. Gazeta raporton se drejtuesit e klubit kanë kontaktuar tashmë me Deschampsin, i cili është pa angazhim që nga largimi nga Kombëtarja e Francës pas Kupës së Botës 2026. Tekniku francez ka përcjellë mesazhin përmes një ndërmjetësi se është i gatshëm të marrë drejtimin e skuadrës, bën të ditur e njëjta gazetë.

Përveç tij, mediat italiane përmendin si kandidatë potencialë edhe Stefano Piolin dhe Antonio Conten. Nga ana tjetër, gazeta La Repubblica shkruan se Conte preferon të presë zhvillimin e situatës te skuadra e Manchester United përpara se të marrë një vendim.

Luciano Spalletti është në krye të stolit të Juventusit që nga tetori i vitit 2025, kur zëvendësoi Igor Tudorin. Testi i radhës dhe ndeshja vendimtare për të ardhmen e tij do të jetë të dielën në Allianz Stadium, ku Juventusi do të presë Napolin në kuadër të kampionatit.

Ish-trajneri francez ka një histori të gjatë me klubin italian, pasi ka luajtur si futbollist i Juventusit nga viti 1994 deri në vitin 1999, periudhë gjatë së cilës fitoi Ligën e Kampionëve në vitin 1996 dhe tre tituj kampionë në Itali. Më pas, Deschamps u rikthye te klubi si trajner në vitin 2006, pas rënies së skuadrës në Serie B për shkak të aferës Calciopoli, duke e ndihmuar ekipit të rikthehej menjëherë në elitë që në sezonin e tij të parë.